4 Тое, што нясе праўду

Мяне заўсёды здзіўляла, што для такіх вялікіх цывілізацый як Старажытны Егіпет, Старажытная Грэцыя ці ацтэкі было характэрна шматбожжа. Ледзь не кожнай з'яве надавалася асаблівае, боскае значэнне, і толькі незвычайныя істоты маглі рэгуляваць жыццё простых людзей. Богі так трывала ўмацаваліся ва ўсіх сферах жыцця, што без іх немагчыма было ўявіць само існаванне дзяржавы.

Старажытны Егіпет часоў XVIII дынастыі - гэта краіна, поўная крыві і гвалту. Рэлігія нясе свой уплыў усё больш люта, навязваючы ўладу багоў. З-за жрацоў бога Амона юны Тутмос пазбавіўся звыклага ўкладу жыцця. Раней - сын землеўладальніка, цяпер - раб без будучыні. І ўсё ж лёс аказаўся добразычлівым для яго. Ён стаў вучнем скульптара і адкрыў для сябе самае галоўнае ў свеце - праўду. Менавіта гэта стала мэтай яго жыцця. Пасля дзякуючы ўпартай працы Тутмос дамогся высокага прызнання фараона Аменхатэпа IV і стаў паслядоўнікам яго вучэння. Менавіта Аменхатэп IV распачаў спробу прывесці рэлігію Старажытнага Егіпта да пакланення адзінаму богу - вялікаму Атону. У гісторыю фараон увайшоў як Эхнатон.

Аднак лютая рэлігійная рэформа была ўспрынятая жрацамі бога Амона даволі скептычна. І тым не менш назіраецца ў кнізе гвалтоўнае навязванне аднабожжа. Эхнатон са сваімі прыхільнікамі стварае новую сталіцу - Ахетатон. Варожа настроеныя Фівы з богам Амонам былі пакінуты. Старыя каноны і правілы сцёртыя, пакланенне іншаму богу караецца.

Але менавіта гэты перыяд становіцца для маладога Тутмоса часам росквіту ўласнага таленту. Бо менавіта фараон Эхнатон паказаў яму праўду, сапраўдную, непрыхарошаную.  Аднак скульптар пачынае сумнявацца, а ці праўдзіва ўсё тое, што ён бачыць, чуе, адчувае. Ці мае рацыю сам Эхнатон, ці існуе праўда ў яго справах?

Культ Атона ў асобе Эхнатона паступова знікае. Пасля смерці фараона ўплыў жрацоў бога Амона ўзмацняецца. Нават невялікая колькасць паслядоўнікаў Атона не здольна справіцца з новымі рэформамі. Імя Эхнатона губляецца ў пясках часу, а Тутмос застаецца ў памяці нашчадкаў як аўтар знакамітага бюста жонкі Эхнатона, Неферціці.